Corsi de catalan

Era UAB aufrís formacion en lengua catalana as escolans nauvengudi que s’inícien en aguest idiòma. Es corsi an per tòca facilitar era insercion lingüistica e socioculturau d’aguestes persones ena UAB e se i hè ua introduccion progressiva ara lengua, ajustada as besonhs individuaus e as caracteristiques des escolans.

T’aufrim corsi de catalan de toti es nivèus, deth basic enquiath superior. Se vòs auer un prumèr contacte damb era nòsta lengua te pòs inscríuer en cors d’iniciacion Català per a principiants.

Idiomes UPF aufrís corsi de diferentes modalitats e intensitats de toti es nivèus de catalan, deth nivèu iniciau A1 enquiath nivèu superior C2 deth Marc europèu comun de referéncia entàs lengües (MECR): Era aufèrta de corsi s’actualize constantaments entà satisfèr es besonhs des escolans, que pòden procedir tant dera madeisha Universitat Pompeu Fabra coma de d’autes. Es estudiants pòden accedir, per exemple, a corsi trimestraus de nivèu A1, A2 e B1 qu'en sonque 45 ores permeten d’arténher un nivèu complèt deth MECR, e tanben a corsi mensuaus de preparacion der examen oficiau interuniversitari de nivèu C1 o a corsi semestraus de nivèu C2.

Era UdL aufrís corsi de catalan de toti es nivèus, damb era possibilitat d’obtier un certificat oficiau. Entàs qui non an agut cap de contacte damb era lengua, tar inici de cada semèstre se hè un cors de nivèu iniciau intensiu damb er objectiu de dar es coneishences basiques entà desvolopar-se ena universitat.

Coma continuacion dera formacion arrecebuda en acuelh iniciau o se ja auetz bèra coneishença prealabla de catalan, podetz seguir un cors de catalan de nivèu A2. Aguest cors cònste d’un blòc virtuau de trabalh tutorizat, e d’un blòc presenciau de convèrsa.

Ena URV pòs apréner catalan (presenciaument o virtuaument) e acreditar oficiaument es tues coneishences de lengua catalana. En Servici Lingüistic i trobaràs ua aufèrta variada de corsi d’A1, A2, B1, B2, C1 e C2 (a mès de d’auti corsi especifics).

Es corsi en linha de catalan dera UOC s’adrecen a persones que se vòlen iniciar en aguesta lengua (corsi de nivèu basic, A1 e A2) o que ja son capables d'emplegar era lengua catalana en situacions de vida vidanta e mejanament formaus (corsi de nivèus B2 e C1). Tota era formacion virtuau s'amie de forma non sincrona e, en toti es nivèus, er aprendissatge s'adapte ara tua disponibilitat e ath tòn dia a dia.

Ja ac sabes, qu'ena ciutat de Vic e ath sòn torn era lengua majoritària de comunicacion ei eth catalan? Se participes en un programa d’escambi internacionau seguraments poiràs assistir a bères classes en d’autes lengües, mès veiràs qu'es tòns companhs se comuniquen entre eri en catalan. Apren-ne! Inscriu-te a un cors gratuït des Servicis Lingüistics. Se ja parles bèra auta lengua romanica, i trobaràs fòrça semblances. Apréner catalan te permeterà de conéisher gent naua e descorbir ua naua cultura.

Informe-te’n a sl@uvic.cat.

Tant ei se vies d’arribar en Catalonha e non sabes bric de catalan. En UIC Barcelona t’aufrim corsi semestraus de catalan de toti es nivèus e en diferentes modalitats d’aprendissatge. A mès, a trauès des examens oficiaus restacadi as nòsti corsi, poderàs obtier un certificat oficiau de catalan.

Aufrim corsi semipresenciaus e virtuaus, tant entà acreditar un nivèu iniciau coma entà amelhorar o refrescar es coneishences de catalan. Es nòsti corsi aufrissen atencion tutorizada e era possibilitat de realizar er examen oficiau CLUC, elaborat pera CIFALC, en acabar eth cors.