Eth catalan ena universitat

Eth catalan ei era lengua d'usatge normau ena activitat d'ensenhament e administrativa enes universitats catalanes. Es Estatuts des universitats arreconeishen eth catalan coma lengua pròpria, e acuelhen era lengua espanhòla en conviuéncia damb era catalana en plea egalitat de drets entara comunitat universitària.

Eth personau academic e er alumnat an eth dret d'exprimir-se, en quinsevolhe situacion d'ensenhament, ena lengua oficiau que preferisquen.

Entàs estudiants de dehòra der encastre lingüistic catalan, er aprendissatge dera lengua catalana ei fòrça mès simple damb era coneishença prealabla de bèra auta lengua romanica. En totes es universitats s'aufrís ua formacion gratuïta o subvencionada, soent abans deth periòde academic, que hè possible que se pogue compréner era lengua des classes, dera universitat e en definitiva, dera ciutat. Non se demane que parlen eth catalan, mès que lo poguen compréner.

Apuprètz eth 60% des classes des nòstes universitats ei en catalan. Era lengua ena qué se hè cada matèria ei ua informacion publica que normauments apareishe enes guides ensenhaires. Ena majoritat d'universitats, non existissen dues linhes -ua en catalan e er auta en castelhan- entàs estudiants de mobilitat, mès que conviuen estudiants catalans damb es que vien de dehòra, çò que represente un enriquiment entà toti.

Es universitats aufrissen tanben corsi d'espanhòu entà estrangèrs, mès non tostemp ei ua formacion gratuïta o subvencionada. Se constate de mès en mès qu'es estudiants qu'arriben tà Catalonha ja an coneishences sufisentes de lengua espanhòla e, en tot cas, la pòden perfeccionar. Per contra, pòden profitar eth sojorn entà iniciar-se ena coneishença dera lengua catalana.

Qu'ei recomanable profitar es programes d'acuelhuda que i a en totes es universitats, qu'includissen hèstes de benvenguda, era possibilitat d'auer un parelh lingüistic damb qui practicar era lengua que s'apren, o era oportunitat de participar en gessudes culturaus.

Se non voletz mancar vida sociau e culturau des nòstes ciutats, vos anarà ben apréner catalan, pr'amor que lèu vos senteratz que hètz part dera comunitat, e poderatz participar enes nombroses activitats que se programen. Un còp ajatz aprenut un shinhau de catalan, auratz nombroses oportunitats de practicar-lo, laguens e dehòra dera Universitat!